ഐപിഎല്‍ ടി20 ലീഗിന്റെ 18-ാം പതിപ്പിന് (IPL 2025) മാര്‍ച്ച് 22ന് കൊല്‍ക്കത്ത ഈഡന്‍ ഗാര്‍ഡന്‍സില്‍ തുടക്കമാവും. വര്‍ണാഭമായ ഉദ്ഘാടന ചടങ്ങില്‍ ബോളിവുഡ് സൂപ്പര്‍ താരങ്ങള്‍ ഉള്‍പ്പെടെയുള്ളവര്‍ അണിനിരക്കും. ഉദ്ഘാടന മത്സരത്തിന് മുന്നോടിയായി കലാ-സാംസ്‌കാരിക-വിനോദ പരിപാടികള്‍ അരങ്ങേറും.കൊല്‍ക്കത്ത നൈറ്റ് റൈഡേഴ്സും റോയല്‍ ചലഞ്ചേഴ്സ് ബെംഗളൂരുവും (KKR vs RCB) തമ്മിലുള്ള മല്‍സരത്തോടെ ഐപിഎല്‍ 2025ന് തുടക്കമാവും. ഐസിസി ചെയര്‍മാന്‍ ജയ് ഷാ പങ്കെടുക്കും. ആരാധകരെ രസിപ്പിക്കാന്‍ ബോളിവുഡ് താരം ദിഷ പട്ടാനി, ഗായിക ശ്രേയ ഘോഷാല്‍, കരണ്‍ ഔജ്ല എന്നിവരെത്തും. സല്‍മാന്‍ ഖാന്‍, വരുണ്‍ ധവാന്‍, കത്രീന കൈഫ്, ട്രിപ്തി ദിമ്രി, അനന്യ പാണ്ഡെ, മാധുരി ദീക്ഷിത്, ജാന്‍വി കപൂര്‍ തുടങ്ങിയവരും വേദിയിലെത്തുമെന്ന് പ്രതീക്ഷിക്കുന്നു.
ഐപിഎല്ലില്‍ ആദ്യമായി മത്സരങ്ങള്‍ നടക്കുന്ന 13 വേദികളിലും ഉദ്ഘാടന ചടങ്ങുകള്‍ സംഘടിപ്പിക്കാന്‍ ഇന്ത്യന്‍ ക്രിക്കറ്റ് കണ്‍ട്രോള്‍ ബോര്‍ഡ് (ബിസിസിഐ) തീരുമാനിച്ചിട്ടുണ്ട്. ഈ ചടങ്ങുകളില്‍ പങ്കെടുക്കേണ്ട സെലിബ്രിറ്റികളുടെ പട്ടിക തയ്യാറായി വരുന്നു. ഇന്നിങ്സുകള്‍ക്കിടയില്‍ പരിമിതമായ സമയത്ത് രണ്ടോ മൂന്നോ കലാകാരന്മാരുടെ പ്രകടനങ്ങളുണ്ടാവും.
ഇത്തവണ 10 ഐപിഎല്‍ ഫ്രാഞ്ചൈസികളുടെ സ്ഥിരം വേദികള്‍ക്ക് പുറമേ രണ്ടാം ഹോം സ്റ്റേഡിയങ്ങളിലും മത്സരങ്ങള്‍ നടക്കും. ഗുവാഹത്തി, വിശാഖപട്ടണം, ധര്‍മ്മശാല, മുള്ളന്‍പൂര്‍ തുടങ്ങിയ സ്ഥലങ്ങളിലായി രാജസ്ഥാന്‍ റോയല്‍സ്, ഡല്‍ഹി ക്യാപിറ്റല്‍സ്, പഞ്ചാബ് കിങ്‌സ് ടീമുകളുടെ മത്സരങ്ങള്‍ നടക്കും.
ഉദ്ഘാടന ചടങ്ങിനായി ബിസിസിഐ 35 മിനിറ്റ് ആണ് അനുവദിച്ചിട്ടുള്ളത്. മത്സരത്തിനുള്ള എല്ലാ ടിക്കറ്റുകളും വിറ്റുതീര്‍ന്നു. രാമനവമി ആഘോഷങ്ങള്‍ കാരണം മതിയായ സുരക്ഷ ഒരുക്കാനുള്ള അസൗകര്യങ്ങള്‍ പരിഗണിച്ച് ഏപ്രില്‍ 6 ന് ലഖ്നൗ സൂപ്പര്‍ ജയന്റ്സുമായുള്ള കൊല്‍ക്കത്ത നൈറ്റ് റൈഡേഴ്സിന്റെ ഹോം മാച്ച് മറ്റൊരു ദിവസത്തേക്ക് മാറ്റാനിടയുണ്ട്. രണ്ടോ മൂന്നോ ദിവസത്തിനുള്ളില്‍ ബിസിസിഐയുടെ തീരുമാനമുണ്ടാവും.
ഐപിഎല്‍ 2025 ഉദ്ഘാടന ചടങ്ങ് ഇന്ത്യയില്‍ സ്റ്റാര്‍ സ്‌പോര്‍ട്‌സും സ്‌പോര്‍ട്‌സ് 18 നെറ്റ്വര്‍ക്കില്‍ സംപ്രേഷണം ചെയ്യും. ജിയോ ഹോട്ട്‌സ്റ്റാര്‍ ആപ്പിലും വെബ്സൈറ്റിലും ലൈവ് സ്ട്രീമിങ് ഉണ്ടായിരിക്കും.
ഉദ്ഘാടന ചടങ്ങ് ഇന്ത്യന്‍ സമയം വൈകുന്നേരം 6:00 മണിക്ക് ആരംഭിക്കും. പങ്കെടുക്കുന്ന കൂടുതല്‍ സെലിബ്രിറ്റികളുടെ പേരുകള്‍ അടുത്ത ദിവസങ്ങളില്‍ പുറത്തുവിട്ടേക്കും. വൈകുന്നേരം ഏഴ് മണിക്കാണ് ടോസ്. 7.30 ന് മല്‍സരം ആരംഭിക്കും.
